Shri Ganesha Aparadhaxamapanastotram

শ্রীগণেশাপরাধক্ষমাপণস্তোত্রম্

শ্রীগণেশায় নমঃ ।
সুমুখো মখভুঙ্মুখার্চিতঃ সুখবৃদ্ধ্যৈ নিখিলার্তিশান্তয়ে।
অখিলশ্রুতিশীর্ষবর্ণিতঃ সকলাদ্যঃ স সদাঽস্তু মে হৃদি ॥ ১॥

প্রণবাকৃতিমস্তকে নয়ঃ প্রণবো বেদমুখাবসানয়োঃ।
অয়মেব বিভাতি সুস্ফুটং হ্যবতারঃ প্রথমঃ পরস্য সঃ ॥ ২॥

প্রথমং গুণনায়কো বভৌ ত্রিগুণানাং সুনিয়ন্ত্রণায় যঃ।
জগদুদ্ভবপালনাত্যযেষ্বজবিষ্ণ্বীশসুরপ্রণোদকঃ ॥ ৩॥

বিধিবিষ্ণুহরেন্দ্রদেবতাদিগণানাং পরিপালনাদ্বিভুঃ।
অপি চেন্দ্রিয়পুঞ্জচালনাদ্গণনাথঃ প্রথিতোঽর্থতঃ স্ফুটম্ ॥ ৪॥

অণিমামুখসিদ্ধিনায়কা ভজতঃ সাধয়তীষ্টকামনাঃ।
অপবর্গমপি প্রভুর্ধিয়ো নিজদাসস্য তমো বিহৃত্য যঃ ॥ ৫॥

জননীজনকঃ সুখপ্রদো নিখিলানিষ্টহরোঽখিলেষ্টদঃ।
গণনায়ক এব মামবেদ্রদপাশাঙ্কুশমোদকান্ দধৎ ॥ ৬॥

শরণং করুণার্ণবঃ স মে শরণং রক্ততনুশ্চতুর্ভুজঃ।
শরণং ভজকান্তরায়হা শরণং মঙ্গলমূর্তিরস্তু মে ॥ ৭॥

সততং গণনায়কং ভজে নবনীতাধিককোমলান্তরম্।
ভজনাদ্ভবভীতিভঞ্জনং স্মরণাদ্বিঘ্ননিবারণক্ষমম্ ॥ ৮॥

অরুণারুণবর্ণরাজিতং তরুণাদিত্যসমপ্রভং প্রভুম্।
বরুণায়ুধমোদকাবহং করুণামূর্তিমহং প্রণৌমি তম্ ॥ ৯॥

ক্ব নু মূষকবাহনং প্রভুং মৃগয়ে ত্বজ্ঞতমোঽবনীতলে।
বিবুধাস্তু পিতামহাদয়স্ত্রিষু লোকেষ্বপি যং ন লেভিরে ॥ ১০॥

শরণাগতপালনোৎসুকং পরমানন্দমজং গণেশ্বরম্।
বরদানপটুং কৃপানিধিং হৃদয়াব্জে নিদধামি সর্বদা ॥ ১১॥

সুমুখে বিমুখে সতি প্রভৌ ন মহেন্দ্রাদপি রক্ষণং কদা।
ত্বয়ি হস্তিমুখে প্রসন্নতাঽভিমুখেনাপি যমাদ্ভয়ং ভবেৎ ॥ ১২॥

সুতরাং হি জডোঽপি পণ্ডিতঃ খলু মূকোঽপ্যতিবাক্পতির্ভবেৎ।
গণরাজদয়ার্দ্রবীক্ষণাদপি চাজ্ঞঃ সকলজ্ঞাতামিয়াৎ ॥ ১৩॥

অমৃতং তু বিষং বিষং সুধা পরমাণুস্তু নগো নগোঽপ্যণুঃ।
কুলিশং তু তৃণং তৃণং পবির্গণনাথাশু তবেচ্ছয়া ভবেৎ ॥ ১৪॥

গতোঽসি বিভো বিহায় মাং ননু সর্বজ্ঞ ন বেৎসি মাং কথম্।
কিমু পশ্যসি বিশ্বদৃঙ্ ন মাং ন দয়া কিমপি তে দয়ানিধে ॥ ১৫॥

অয়ি দীনদয়াসরিৎপতে ময়ি নৈষ্ঠুর্যমিদং কুতঃ কৃতম্।
নিজভক্তিসুধালবোঽপি যন্ন হি দত্তো জনিমৃত্যুমোচকঃ ॥ ১৬॥

নিতরাং বিষয়োপভোগতঃ ক্ষপিতং ত্বায়ুরমূল্যমেনসা।
অহহাজ্ঞতমস্য সাহসং সহনীয়ং কৃপয়া ত্বয়া বিভো ॥ ১৭॥

ভগবন্নহি তারকস্য তে বত মন্ত্রস্য জপঃ কৃতস্তথা।
ন কদৈকধিয়াপি চিন্তনং তব মূর্তেস্তু ময়াতিপাপ্মনা ॥ ১৮॥

ভজনং ন কৃতং সমর্চনং তব নামস্মরণং ন দর্শনম্।
হবনং প্রিয়মোদকার্পণং নবদূর্বা ন সমর্পিতা ময়া ॥ ১৯॥

নচ সাধুসমাগমঃ কৃতস্তব ভক্তাশ্চ ময়া ন সৎকৃতাঃ।
দ্বিজভোজনমপ্যকারি নো বত দৌরাত্ম্যমিদং ক্ষমস্ব মে ॥ ২০॥

ন বিধিং তব সেবনস্য বা নচ জানে স্তবনং মনুং তথা।
করয়ুগ্মশিরঃসুয়োজনং তব ভূয়াদ্গণনাথপূজনম্ ॥ ২১॥

অথ কা গণনাথ মে গতির্নহি জানে পতিতস্য ভাবিনী।
ইতি তপ্ততনুং সদাঽব মামনুকম্পার্দ্রকটাক্ষবীক্ষণৈঃ ॥ ২২॥

ইহ দণ্ডধরস্য সঙ্গমেঽখিলধৈর্যচ্যবনে ভয়ঙ্করে।
অবিতা গণরাজ কো নু মাং তনুপাতাবসরে ত্বয়া বিনা ॥ ২৩॥

বদ কং ভবতোঽন্যমিষ্টদাচ্ছরণং যামি দয়াধনাদৃতে।
অবনায় ভবাগ্নিভর্জিতো গতিহীনঃ সুখলেশবর্জিতঃ ॥ ২৪॥

শ্রুতিমৃগ্যপথস্য চিন্তনং কিমু বাচোঽবিষয়স্য সংস্তুতিম্।
কিমু পূজনমপ্যনাকৃতেরসমর্থো রচয়ামি দেবতে ॥ ২৫॥

কিমু মদ্বিকলাৎস্বসেবনং কিমু রঙ্কাদুপচারবৈভবম্।
জডবাঙ্মতিতো নিজস্তুতিং গণনাথেচ্ছসি বা দয়ানিধে ॥ ২৬॥

অধুনাপি চ কিং দয়া ন তে মম পাপাতিশয়াদিতীশ চেৎ।
হৃদয়ে নবনীতকোমলে ন হি কাঠিন্যনিবেশসম্ভবঃ ॥ ২৭॥

ব্যসনার্দিতসেবকস্য মে প্রণতস্যাশু গণেশ পাদয়োঃ।
অভয়প্রদহস্তপঙ্কজং কৃপয়া মূর্ধ্নি কুরুষ্ব তাবকম্ ॥ ২৮॥

জননীতনয়স্য দৃক্পথং মুহুরেতি প্রসভং দয়ার্দ্রধীঃ।
মম দৃগ্বিষয়স্তথৈব ভো গণনাথাশু ভবনুকম্পয়া ॥ ২৯॥

গজরাজমুখায় তে নমো মৃগরাজোত্তমবাহনায় তে।
দ্বিজরাজকলাভৃতে নমো গণরাজায় সদা নমোঽস্তু তে ॥ ৩০॥

গণনাথ গণেশ বিঘ্নরাট্ শিবসূনো জগদেকসদ্গুরো।
সুরমানুষগীতমদ্যশঃ প্রণতং মামব সংসৃতের্ভয়াৎ ॥ ৩১॥

জয় সিদ্ধিপতে মহামতে জয় বুদ্ধীশ জডার্তসদ্গতে।
জয় যোগিসমূহসদ্গুরো জয় সেবারত কল্পনাতরো ॥ ৩২॥

তনুবাগ্ হৃদয়ৈরসচ্চ সদ্যদনস্থাত্রিতয়ে কৃতং ময়া।
জগদীশ করিষ্যমাণমপ্যখিলং কর্ম গণেশ তেঽর্পিতম্ ॥ ৩৩॥

ইতি কৃষ্ণমুখোদ্গতং স্তবং গণরাজস্য পুরঃ পঠেন্নরঃ।
সকলাধিবিবর্জিতো ভবেৎসুতদারাদিসুখী স মুক্তিভাক্ ॥ ৩৪॥

ইতি মুদ্গলপুরাণন্তর্বর্তি শ্রীগণেশাপরাধক্ষমাপণস্তোত্রং সম্পূর্ণম্ ।

Encoded by Karthik Chandan.P (kardan5380@yahoo.com)
and Amith K Nagaraj (amithkn@rediffmail.com)
Proofread by Ravin Bhalekar ravibhalekar@hotmail.com