অদ্বৈতপঙ্চরত্নম্ চ
বেদো নিত্যমধীয়তাং তদুদিতং কর্ম স্বনুষ্ঠীয়তাং
তেনেশস্য বিধীয়তামপচিতিঃ কাম্যে মতিস্ত্যজ্যতাম্ ।
পাপৌঘঃ পরিধূয়তাং ভবসুখে দোষোঽনুসন্ধীয়তা-
মাত্মেচ্ছা ব্যবসীয়তাং নিজগৃহাত্তূর্ণং বিনির্গম্যতাম্ ॥ ১॥
সঙ্গঃ সৎসু বিধীয়তাং ভগবতো ভক্তির্দৃঢাঽঽধীয়তাং
শান্ত্যাদিঃ পরিচীয়তাং দৃঢতরং কর্মাশু সন্ত্যজ্যতাম্ ।
সদ্বিদ্বানুপসৃপ্যতাং প্রতিদিনং তৎপাদুকা সেব্যতাং
ব্রহ্মৈকাক্ষরমর্থ্যতাং শ্রুতিশিরোবাক্যং সমাকর্ণ্যতাম্ ॥ ২॥
বাক্যার্থশ্চ বিচার্যতাং শ্রুতিশিরঃপক্ষঃ সমাশ্রীয়তাং
দুস্তর্কাৎসুবিরম্যতাং শ্রুতিমতস্তর্কোঽনুসন্ধীয়তাম্ ।
ব্রহ্মাস্মীতি বিভাব্যতামহরহর্গর্বঃ পরিত্যজ্যতাং
দেহেঽহম্মতিরুজ্ঝ্যতাং বুধজনৈর্বাদঃ পরিত্যজ্যতাম্ ॥ ৩॥
ক্ষুদ্ব্যাধিশ্চ চিকিৎস্যতাং প্রতিদিনং ভিক্ষৌষধং ভুজ্যতাং
স্বাদ্বন্নং ন তু যাচ্যতাং বিধিবশাৎ প্রাপ্তেন সন্তুষ্যতাম্ ।
শীতোষ্ণাদি বিষহ্যতাং ন তু বৃথা বাক্যং সমুচ্চার্যতা-
মৌদাসীন্যমভীপ্স্যতাং জনকৃপানৈষ্ঠুর্যমুৎসৃজ্যতাম্ ॥ ৪ ॥
একান্তে সুখমাস্যতাং পরতরে চেতঃ সমাধীয়তাং
পূর্ণাত্মা সুসমীক্ষ্যতাং জগদিদং তদ্বাধিতং দৃশ্যতাম্ ।
প্রাক্কর্ম প্রবিলাপ্যতাং চিতিবলান্নাপ্যুত্তরৈঃ শ্লিষ্যতাং
প্রারব্ধং ত্বিহ ভুজ্যতামথ পরব্রহ্মাত্মনা স্থীয়তাম্ ॥ ৫॥
॥ ইতি পরমহংসপরিব্রাজকাচার্যশ্রীমচ্ছঙ্করাচার্যবিরচিত
সাধন পঞ্চকং সম্পূর্ণম্ ॥